Сирдарё ва Хитойнинг Гуандун провинциаси ўртасида иқтисодий ҳамкорлик ривожлантирилади
Ўзбекистон Бош консулхонаси кўмагида Сирдарё вилояти ҳокимлиги делегациясининг Хитойга ишчи сафари ташкил этилди, деб хабар қилмоқда “Дунё” АА мухбири.
Ташриф доирасида Гуандун провинциясида фаолият юритаётган қатор компаниялар билан мамлакатимиз қишлоқ хўжалигини ривожлантириш, соҳага замонавий технологиялар ва инновацион ечимларни жорий этиш ҳамда истиқболли лойиҳаларни амалга ошириш масалалари юзасидан музокаралар бўлиб ўтди.
Хусусан, Хитойнинг етакчи “Haid Group”, “Wens Foodstuff Group” ва “Huaxing Holding Group” компаниялари билан ўтказилган учрашувларда вилоят ҳудудида чорвачилик, паррандачилик ва балиқчилик хўжаликларини барпо этиш ҳамда пахта етиштириш ва уруғчиликни ривожлантиришга қаратилган қўшма лойиҳаларни ишлаб чиқиш истиқболлари муҳокама қилинди.
Сермаҳсул учрашувлар якунида юқорида қайд этилган компания вакилларининг 2026 йил январь-март ойларида Сирдарё вилоятига бизнес миссияларини ташкил этишга келишиб олинди.
