Тошкентда ИҲТ аъзо давлатлар қишлоқ хўжалиги вазирларининг VII йиғилиши бўлиб ўтди

ТОШКЕНТ, 8 июль. /«Дунё» АА/. Тошкент шаҳрида Иқтисодий ҳамкорлик ташкилотига (ИҲТ) аъзо давлатлар қишлоқ хўжалиги вазирларининг VII йиғилиши бўлиб ўтди, деб хабар бермоқда «Дунё» АА мухбири.

Ўзбекистон қишлоқ хўжалиги вазирлиги маълумотига кўра, асосий учрашув арафасида ИҲТга аъзо мамлакатлар Қишлоқ хўжалиги вазирликлари экспертларидан иборат ишчи гуруҳнинг йиғилиши бўлиб ўтди.

Ишчи гуруҳ йиғилишида озиқ-овқат хавфсизлиги ва ИҲТга аъзо давлатлар ўртасида савдо-сотиқни енгиллаштириш учун қулай шарт-шароитлар яратиш масалалари муҳокама қилинди. Қишлоқ хўжалигининг озиқ-овқат хавфсизлиги билан бевосита боғлиқ бўлган уруғчилик соҳасини ривожлантиришга алоҳида эътибор қаратилди.

ИҲТга аъзо давлатлар қишлоқ хўжалиги вазирларининг VII йиғилишида қишлоқ хўжалиги соҳасидаги ҳамкорликнинг бугунги ҳолати таҳлил қилиниб, янги истиқболли йўналишлар белгиланди, шунингдек, қишлоқ хўжалиги бўйича Декларация лойиҳаси бўйича фикр алмашилди.

Учрашувда Озарбайжон, Қозоғистон, Қирғизистон, Тожикистон, Туркия, Ўзбекистон қишлоқ хўжалиги вазирлари, Покистон қишлоқ хўжалиги миллий маркази директори ва Эроннинг Ўзбекистондаги элчиси иштирок этди.

Ўзбекистон қишлоқ хўжалиги вазири Жамшид Ходжаев, ўз нутқида БМТнинг Озиқ-овқат ва қишлоқ хўжалиги ташкилоти (ФАО) билан ҳамкорликда ИҲТга аъзо давлатларнинг стратегик шериклиги бўйича қатор ташаббусларни илгари сурди:

-Ўзбекистон ИҲТ мамлакатлари билан жадал ривожланиб бораётган муносабатларни юксак қадрлайди. ИҲТ давлатлари қишлоқ хўжалиги ва чорвачиликни ривожлантиришнинг энг қадимги марказлари ҳисобланади. Ишончимиз комилки, ўзаро савдони янада фаоллаштириш, унинг тузилмасини мақбуллаштириш ва янги ўсиш нуқталарини топиш биз учун ниҳоятда муҳим. Шунингдек, янги савдо услубларини ривожлантиришни ҳам аҳамиятли деб ҳисоблаймиз,- деди Жамшид Ходжаев.- Иқлим ўзгариши, аҳоли сонининг кўпайиши, атроф-муҳит ҳолатининг ёмонлашуви каби баъзи глобал омиллар қишлоқ хўжалигининг ривожланишига тўсқинлик қилмоқда.

Шу муносабат билан БМТ ФАО билан ҳамкорликда ИҲТнинг озиқ-овқат хавфсизлиги соҳасида ҳамкорлик стратегиясини ишлаб чиқиш зарур деб ҳисоблаймиз.