Ўзбекистонда қайта тикланадиган энергиядан фойдаланиш дастури Малайзия ОАВ диққат марказида

КУАЛА-ЛУМПУР, 13 июль. /«Дунё» АА/. Ислом ҳамкорлик ташкилотининг Малайзияда нашр этиладиган «OIC Today» ихтисослаштирилган журналида Ўзбекистонда қайта тикланадиган энергия манбаларидан фойдаланишни кенгайтириш борасидаги саъй-ҳаракатларга бағишланган мақола чоп этилди, деб хабар беради «Дунё» АА мухбири.

Нашрда Ўзбекистонда қайта тикланадиган энергия манбаларидан (ҚТЭ) фойдаланишни кенгайтириш дастури устида иш олиб борилаётгани, 2026 йилга бориб Ўзбекистоннинг умумий энергетика балансидаги ҚТЭ улушини 25 фоизга етказиш режалаштирилгани таъкидланган.

«Дастурга мувофиқ мамлакатда умумий қуввати 4000 мегаватт бўлган саккизта шамол электр станцияси (ШЭС) қурилади. 2023-2024 йилларда Қорақалпоғистон Республикаси, Бухоро ва Навоий вилоятларида тўртта ушбу туркумдаги электр станцияси барпо этилади ва уларнинг умумий қуввати 1600 мегаваттни ташкил этади», дея қайд этади манба.

Материалда, шунингдек, 2025-2026 йилларда Ўзбекистонда умумий ўрнатилган қуввати 2400 мегаватт бўлган тўртта шамол электр станцияси фойдаланишга топширилиши маълум қилинган. Ўзбекистоннинг Навоий, Жиззах, Самарқанд ва Сурхондарё вилоятларида 2023 йилда умумий қуввати 1100 мегаватт бўлган қуёш электр станциялари ишга туширилади. 2024 йилда Бухоро, Наманган, Хоразм, Қашқадарё ва Фарғона вилоятларида умумий қуввати 900 мегаватт бўлган бешта қуёш электр станциясини фойдаланишга топшириш режалаштирилган.

«2025-2026 йилларда Ўзбекистонда умумий қуввати 1800 мегаватт бўлган қуёш фотоэлектр станциялари фаолияти йзлга қўйилади, - деб ёзади «OIC Today». - 2030 йилга бориб қуввати 1 мегаваттгача бўлган кичик қайта тикланадиган энергия манбаларининг умумий ишлаб чиқарилиши 1000 мегаваттга етказилади».

Мақола интиҳосида Ўзбекистонда қайта тикланадиган энергия манбаларидан фойдаланишни бошқариш тизимини янада такомиллаштирилиши қайд этилган.