Мисрдаги ватандош: Ўзбекистон Конституциясига киритилаётган ўзгартиришлар яқин истиқболда Ватанимиз тараққиётини янги босқичга олиб чиқишда тамал тоши бўлиб хизмат қилишига аминмиз

ҚОҲИРА, 27 июль. /“Дунё” АА/. Мисрнинг “Ал-Азҳар” университети магистри Хайрулло Хўжаев мамлакатимизда кенг муҳокама қилинаётган конституциявий ислоҳотларга ўз муносабатини билдирди:

– Биз Мисрда турли жабҳаларда фаолият юритиб келаётган ва вақтинча истиқомат қилаётган Ўзбекистон фуқаролари мамлакатимизда амалга оширилаётган ислоҳотларга асло бефарқ эмасмиз, деди у. - Бу мавзуга доир янгиликлар Қоҳира шаҳридаги Ўзбекистон элчихонасида ташкил этилаётган турли тадбирлар ҳамда юртимиздан Мисрга ташриф буюраётган турли делегациялар билан учрашувлар давомида ҳам тилга олинмоқда.

Ўзбекистон Конституциясига кенг жамоатчилик ва халқимизнинг фикр-мулоҳазалари асосида киритиладиган ўзгартиришлар яқин истиқболда Ватанимиз тараққиётини янги босқичга олиб чиқишда тамал тоши бўлиб хизмат қилишига аминмиз.

Давлатимизнинг Асосий қонунига киритилажак ўзгартишларда бевосита хориждаги ватандошларнинг ҳам ҳуқуқ ва эркинларини таъминлаш ҳамда улар билан тўлақонли ҳамкорликни ривожлантириш ҳамда “инсон қадри” тамойилини юксалтириш бўйича алоҳида мулоҳазаларнинг мавжудлиги бизни қувонтирмоқда.

Мисрдаги аксарият ватандошларимиз мамлакатимизда амалга оширилаётган ислоҳотларга дахлдор эканликларини ҳис қилишади.